L-Orkestra Filarmonika ta’ Malta se tkun qed tagħti kunċert f’Dar il-Mediterran għall-Konferenzi, fl-24 ta’ Novembru 2018 fil-11am, biex tniedi l-MPO Valletta 2018 International Tour.

Taħt id-direzzjoni ta’ Sergey Symbatyan, il-kunċert għat-tour ta’ dan l-istaġun se jiftaħ b’Rebbieħa, poeżija sinfonika miktuba mill-mibki Joseph Vella, kompożitur Għawdxi. Wara, se jingħaqad mal-orkestra l-pjanist Awstrijak Ingolf Wunder, li flimkien mal-orkestra se jdoqq Travel Notebook ta’ Alexey Shor.

Il-kunċert jiġi fi tmiemu bil-Fifth Symphony ta’ Dmitri Shostakovich. Miktuba xhur wara d-denunzja uffiċjali tiegħu, fil-qofol tal-perjodu ta’ ripressjoni tal-Unjoni Sovjetika, il-Fifth Symphony tikkonkludi bil-finali allegruż li joħloq kuntrast qawwi mat-ton tal-bqija tax-xogħol.

Minbarra l-kunċert f’Malta, l-MPO Valletta 2018 International Tour se jkun qed jivvjaġġa wkoll lejn Philadelphia, North Bethesda, New York, Moska, u San Pietruburgu bejn is-27 ta’ Novembru u s-7 ta’ Diċembru 2018. Fost it-teatri prestiġjużi fejn se jdoqqu l-MPO insibu lil Carnegie Hall fi New York, il-Kimmel Centre for the Performing Arts f’Philadelphia, The Music Centre at Strathmore f’North Bethesda, il-Moscow State Tchaikovsky Conservatory f’Moska u l-Mariinsky Theatre f’San Pietruburgu.

Il-Ministru għall-Ġustizzja, Kultura  u Gvern Lokali Owen Bonnici faħħar dan il-pass importanti tal-orkestra u stqarr li “huwa tassew importanti li l-Orkestra Nazzjonali jkollha l-opportunità li tesponi ruħha barra minn Malta, kemm għall-orkestra nnifisha, kif ukoll għal pajjiżna. Wara li diġà għamlet diversi kunċerti fl-Ewropa, il-pass li jmiss kien li din timraħ f’kontinenti oħra”. Hu kompla jgħid li “bis-saħħa ta’ dawn il-kunċerti, qegħdin niċċelebraw it-talent u l-kultura lokali, filwaqt li nipprovdu pjattaforma internazzjonali tat-talent lokali tagħna aktar b’saħħitha, u lil udjenza usa’”.

Iċ-Ċermen tal-Fondazzjoni Valletta 2018 Jason Micallef qal li “l-Fondazzjoni Valletta 2018 ħadmet mill-qrib mal-Orkestra Filarmonika Nazzjonali, u temmen ħafna f’din il-kollaborazzjoni”. Qal li “dawn huma l-opportunitajiet li qed nagħtu, permezz tal-fondi pubbliċi, il-bżulija u ħafna għaqal. Din hija Valletta 2018. Dan it-tour fl-Istati Uniti u r-Russja se jagħti viżibilità qawwija lill-Orkestra nazzjonali tagħna”.

Għal aktar informazzjoni żur www.maltaorchestra.com.

Din l-attività hija maħluqa u organizzata mill-Orkestra Filarmonika ta’ Malta bil-kollaborazzjoni tal-Fondazzjoni Ewropea għall-Appoġġ tal-Kultura, u hija appoġġjata minn Valletta 2018.

 

Valletta 2018 Premium Partners: General Soft Drinks Co. Ltd., Coca Cola, Bavaria and Bank of Valletta