Il-film Meta Tiġi MariRos, li huwa produzzjoni ta’ Shadeena Films, tnebbaħ mill-poeżija bl-istess isem ta’ Lilian Sciberras (isfel).

MariRos dejjem tkun ċ-ċentru tal-attenzjoni – dik li jgħiru għaliha u jzekzku dwarha. Dan il-film jippreżenta dan il-karattru mill-modi kif jipperċepixxuha n-nisa.

Il-kast tal-film jinkludi lil Madeleine Baldacchino fil-parti ta’ MariRos u lil Samuel Sultana li għandu aktar minn parti waħda.

Meta Tiġi MariRos ser jintwera għall-ewwel darba waqt il-Festival Mediterranju tal-Letteratura ta’ Malta nhar il-Ħamis 25 ta’ Awwissu. Il-Festival jibda fit-20:00. Id-dħul huwa ħlas.

Poetry on Film huwa proġett tal-Fondazzjoni Valletta 2018 u Inizjamed.

 

META TIĠI MARIROS – Lilian Sciberras

 

Qaluli ħbiebi l-bieraħ

li meta tiġi MariRos

jintfew id-dwal fl-appartamenti,

jieqaf id-daqq, id-diski, ’r-radjijiet,

jieqfu l-karozzi quddiem id-dwal tat-triq,

jinqata’ għal ftit id-diskors kollu tal-ġirien

u jaqa’ l-kwiet,

u taqa’ l-ħemda kullimkien.

 

Qaluli wkoll li x-xita tieqaf tinżel,

li s-siġar tawwalin ta’ barra t-triq

jgħassu attenti dan l-intervall ta’ skiet

sabiex f’dik il-minuta twila

bejn nofs il-lejl u s-siegħa

tinstema’ MariRos

fl-aqwa mumenti tagħha

tħabbar lil ta’ madwarha

il-karba tal-pjaċir.