It-tnax-il edizzjoni tal-Festival Mediterranju tal-Letteratura ta’ Malta organizzat minn Inizjamed se tittella’ l-Ħamis 24, il-Ġimgħa 25, u s-Sibt 26 ta’ Awwissu, fil-Forti Sant’Iermu, il-Belt Valletta, fit-8.00pm, bis-sehem ta’ awturi ewlenin minn tmien pajjiżi, fosthom ir-rumanziera minn Myanmar Ma Thida u l-awturi ewlenin Maltin Immanuel Mifsud u Alfred Sant.

Minbarra l-qari ta’ novelli u poeżiji minn 12-il awtur u awtriċi differenti minn tmien pajjiżi, se jkun hemm mużika, kotba għall-bejgħ, films tal-poeżija Maltin u barranin, illegar artiġjanali tal-kotba, xorb u ikel magħmul mill-ħanut Ġugar.

L-awturi kollha mistiedna għall-edizzjoni ta’ din is-sena tal-Festival huma John Aquilina (Ir-Renju Unit/Malta), Asja Bakić (il-Bosnja Ħerżegovina), Mourid  Barghouti (il-Palestina), Lilia Ben Romdhane (it-Tuneżija), Mark Camilleri (Malta), Immanuel Mifsud (Malta), Jean Portante (il-Lussemburgu), Alfred Sant (Malta), Zoë Skoulding (Wales), Ma Thida (Myanmar), Arvis Viguls (il-Latvja), u Gjoko Zdraveski (ir-Repubblika tal-Maċedonja).

Il-qari se jkun l-aktar bil-Malti u bl-Ingliż, imma jinqraw ukoll xi xogħlijiet bil-lingwa oriġinali.

 

Il-Programm tal-Festival

Il-Ħamis 24 ta’ Awwissu:

  • John Aquilina
  • Lilia Ben Romdhane
  • Gjoko Zdraveski
  • Alfred Sant (intervistat mill-kittieb u t-traduttur Mark Vella)
  • Tnedija ta’ 2 films tal-poeżija Maltin ikkummissjonati mill-Fondazzjoni Valletta 2018 u Inizjamed, ippreżentati minn Kenneth Scicluna – xogħol minn Nicky Aquilina u Lyanne Mifsud b’rappreżentazzjoni tax-xogħol ta’ Maria Grech Ganado “Relazzjoni”
  • Kitarrist tal-jazz Sandro Zerafa u l-bassist Oliver Degabriele

Il-Ġimgħa 25 ta’ Awwissu:

  • Mark Camilleri
  • Jean Portante
  • Asja Bakić
  • Mourid Barghouti (intervistat minn Norbert Bugeja)
  • Tnedija ta’ 2 films tal-poeżija Maltin ikkummissjonati mill-Fondazzjoni Valletta 2018 u Inizjamed, ippreżentati minn Kenneth Scicluna
  • John Bartolo fuq id-drums u Jimmy Bartolo (Brikkuni) fuq il-kitarra

Is-Sibt 26 ta’ Awwissu:

  • Zoë Skoulding
  • Immanuel Mifsud
  • Ma Thida (intervistata minn Clare Azzopardi)
  • Film tal-poeżija barrani u mużika lajv minn John Bartolo fuq id-drums u Jimmy Bartolo (Brikkuni) fuq il-kitarra

Id-dħul huwa b’xejn u kulħadd jista’ jattendi. Xi kitbiet jistgħu jkunu maħsuba għal udjenza matura.

Ħames attivitajiet ta’ qabel il-Festival

 Bħala parti mill-preparamenti għall-Festival, Inizjamed qed tippreżenta ħames attivitajiet speċjali. Dawn l-attivitajiet huma b’xejn u kulħadd huwa mistieden li jattendi. L-attivitajiet jibdew il-Ħadd 21 ta’ Awwissu u jibqgħu għaddejjin sas-Sibt 26 ta’ Awwissu.

Fil-ġimgħat ta’ qabel il-Festival, attivitajiet letterarji oħra li jinvolvu l-kittieba Maltin se jkunu qed iseħħu f’Għawdex, f’dar tal-mistrieħ u fi skola tas-sajf.

It-traduzzjoni tax-xogħol ta’ xulxin

 Il-kittieba se jkunu f’Malta matul il-ġimgħa tal-festival biex jieħdu sehem fil-Malta LAF Literary Translation Workshop immexxi minn Keith Borg u Nadia Mifsud. Se jkunu qed jittraduċu x-xogħol ta’ xulxin, u jaqraw uħud mit-traduzzjonijiet matul il-festival.

L-edizzjoni tal-2017 tal-Festival Mediterranju tal-Letteratura ta’ Malta u l-workshop tat-traduzzjoni LAF qed jittellgħu bl-għajnuna tal-Fondazzjoni Valletta 2018, tal-Kunsill Malti għall-Arti, Heritage Malta, l-Għaqda tal-Malti – Università u The Fortress Builders – Fortifications Interpretation Centre. Dan il-Festival ingħata rikonoxximent internazzjonali permezz tat-timbru EFFE Europe for Festivals, Festivals for Europe.

Il-Festival jinsab fuq Facebook u fuq inizjamedmalta.wordpress.com.